هنا.. كان اليماني علي والمخبر وفرن (القاز)
هنا.. كنا نعيش أجمل حياة يعيشها الأطفال
هنا.. كنا نتجمَّع.. ونتقاسم خبزة الخباز
يوم الخبزة بعشر قروش.. والببسي بربع ريال
نهدد لو نسوي شي.. بالدكتور (والبرواز)
ورغم تهديدنا لو نغلط.. فينا شقاوة حال
أطفال بعرفنا السرقة إنجاز ما بعده إنجاز
ونحسد تكرمون من خويانا اللي عليه (نعال)
ما ندري وش يصير ببورما والقدس والأهواز
ولا من الفقر ومن الجوع ويش يصير بالصومال
ولا نعرف وش العطر.. ولا نعرف متجر القزاز
ولا كنا نعرف القبعة.. والشورت.. والبنطال
ومجالسنا أحاديث.. وفتاوى شيخنا بن باز
ما بالناس أحد مشغول بالدنيا وجمع المال
نفسيًّا من جهلنا بالمشاكل.. وضعنا ممتاز
ما بالديرة قنوات فضائيَّة ولاجوَّال
ما يوجد غير راديو مشتريه (بدس) أبو فواز
ولا يقدر يقول إن المذيع فلان.. قال وقال
نقلت بكل أمانة وبحيادية.. لكم وإيجاز
ما قاله شايب وريته الصورة.. ودمعه سال
وودعته عقب قام احترامًا لي على العكاز
وقال وهو يردد عبرته من زود ضيّق البال
ياليت الوقت الأول يا ولدي يرجع.. وفرن (القاز)
ويرجع علي.. والمخبز.. ونرجع من جديد أطفال
صحيفة يومية تصدر عن مؤسسة المدينة للصحافة والنشر
